游龍戲鳳

年初三, 如往年一樣, 飲完茶去黃大仙拜神。



不過今年真係好多人, 勁打蛇餅, 行到個人暈暈地, 後面個阿嬸個鄉下話講到好大聲...等左成粒鍾, 卒之可以入去上香, 好多好多人, D"香"好攻眼。
D人係咁叫: 喂, D"香"向上啦....對眼就係咁流眼淚..嗚....仲有成頭灰...



用極速既時間拿拿聲上香, 之後就同細佬妹去求簽。每年去求既, 除左家宅, 都係事業同姻緣。

其實解簽佬講既都係個D說話: 要等呀、會有轉機呀、做多D善事呀...依D老生常談既說話。但唔知點解, 每年都要聽一次, 去求一次至心安。



可能, 暗地裡我都係想有人同我講依D鼓勵性既說話去SUPPORT我繼續行落去...







*******************************************





係我好細個個陣, 媽媽有時都帶我地去睇戲, 不過, 諗番起都好耐咯, 都有10年以上喇...

係今年, 我同細佬妹就帶左媽媽去睇游龍戲鳳 喇。(本來想睇家有喜事, 不過硬係覺得太胡鬧)




























個古仔太過童話, 都係灰姑娘遇上王子既故事..不過, 咁都好既, 起碼讓現實中既你同我, 有個幻想同希望。幻想自己係灰姑娘, 終有一日有個有錢, 又靚仔, 仲要有咁愛我既人出現...


反而身邊既何韻詩,林嘉華既出現來得更真, 更貼近現實。較喜歡何韻詩與張涵予那段, 很可愛, 很窩心。


幸福是要自己爭取的。




.

年初一

以往既年初一, 都要去爸爸朋友屋企拜年, 縱使萬般不願意, 因為年年都係問個d問題:

仲讀緊書個陣:
-今年考第幾呀?
-今年中五呀?
-幾時大學畢業?

出黎做野:
-係邊樹做呀? (講左幾廿次都要問囉...)

最煩既一條:
-拍拖未? 幾時結婚呀? (okok, 有就會通知你喇...)

到左依家, 其實都唔駛去拜年喇。因為d老人家走左。


其實去拜年都係大家聯誼下, 開住部電視, 都係個d新春慶團圓個d, 大人有大人傾下計, 我就鍾意同細佬妹食哂人地全盒好好味個d糖, 總之間屋要好嘈好嘈, 食完餐飯, 走之前係門口互"質番"大家俾番d糖呀, 橙呀, 蘿蔔糕呀至走。個陣條街真係好多紅當當既一家人行黎行去, d人個個都有恤過髮呀,好高好圓個d, 家下諗起都好好笑。

但唔知點解, 可能人大左啦又未有家庭, 依家都冇乜個種氣氛喇...

依家? 咪仲係睇住電視既賀年節目....


.

新春大吉

祝諸君:

恭喜發財!

萬事如意!

身體健康

~更緊要財色兼收。

封利是大封D 啦。多謝。

*******

好凍。


.

醉駕累人

醉駕累人 貨車壓毀的士六死
過年前有單咁既事, 真係好唔開心。

一個咁既司機, 淨係坐監絕對唔夠, 六條人命呀, 唔單止係六個人, 係六個家庭。就算判死刑都唔能夠彌補, 係做咩都唔能夠補償。

我不撤嬌

小學放學一大班人放學個陣, 總有d同學仔既父母或者阿爺阿"女麻"接放學, 之後就會有人幫d 小朋友背起書包, 個小朋友就好輕鬆咁跳跳虎跳番屋企。而我, 在我有應知以來, 絕少有人接過我放學。

記得僅有的一次, 忽然見到爸爸在遠處等我, 我記得個一刻我好開心咁笑:.好野, 有人接我放學喇...當我滿心歡喜咁以後可以好似其他小朋友咁想將個書包除低再交俾爸爸既時候, 我見到爸爸見掉下一個嚴厲既眼神, 叫我自己拎番...長大後, 我知道爸爸是要我趕快獨立, 不可倚賴。

所以, 由細到大, 見到身邊既人隨便撤撤嬌嬌, 好多野可以垂手可得, 雖然我其實暗地裡萬分羨慕, 我唔明點解有人可以乜都唔駛做, 自己就算做餐死都吃力不討好..

我會善解人意, 我會大方得體, 我會嚴厲自己, 因為我明白撤嬌對我來說係無用,我只唯有靠自己既努力。

我的媽媽

睇到空姐的行李篋 Elaine講媽媽, 我都想講..

1) 如果過左夜晚7點洗頭, 會俾我阿媽勁鬧, 理由係咁夜(?!!)洗頭老左會有頭風(!!)。我習慣日日洗, 放工6點, 要極速返屋企, 係佢未返屋企前洗左先。

成幾廿歲人, 我成日都覺得我好似做賊咁。如果過左時間, 我寧願第朝早起身洗。

2) 我成日係屋企佢會話我係自閉, 思想封閉, 唔出去識人。佢唔記得個陣中學我想同d同學玩, 都會俾佢剷到上天。

3) 開開心心咁係星期六煮餐飯俾屋企人食, 就係因為星期六我仲係屋企, 都要勁鬧+好難聽既說話。我激到即刻要走落街自己睇左場戲抖氣...

4) 同一齊好多年既男友埋門時分手, 佢第一句係叫我唔好咁大脾氣 (!!)

5) F.5 , F.7 , 大學考試, 溫書去到12點幾, 會話: 讀咁多書黎做乜, 又唔係勁....

6) 同佢講我會讀Master (自己供呀), 佢會話我浪費時間..&@#mailto:#*@^#*@%

仲有好多好多..........................

我知佢係我阿媽, 好緊我, 好愛我, 好擔心我。不過真係好難受。有時就算你唔支持我, 唔緊要, 都唔好踩多腳...

我可以點? 哭過, 鬧過, 平心講道理過....都係咁...

咁...咪咁囉, 唔係點喎。

友誼

我是很愛我的朋友。

每開始一段友誼時, 我總會小心奕奕, 好好保護, 希望真的友誼永固。

可是, 有些人, 愈認識久了, 他們會看準你的弱點, 一刀插下去後便逃走...

小學時候玩"躲避球", 球忽然被拋入水地上, 沒有人願意取回,我一股勁跑進去, 拾起它 。可是之後即有人話我蠢, 因為其實可以唔駛自己執....

中學時, 因為不肯埋一班自以為是既人堆, 中五放榜後自己搵學校個種心情只有自己承受...

大學時, 曾經以為有一個有共同理想, 啱傾既朋友可以同渡大學美好生活; 結果讓我發現她偷偷抄我功課, 之後仲要攞得高分過我,...

以上這些都不是我的朋友。

家下有時上facebook, 見到中學 or 大學同學既gathering既相, 我唔知幾多中間有真情假意 (我真係聽個有朋友去完後講左句: 都唔知黎仲乜? 咁又點解要去呢請問?), 但有些聚會, 既然只是hi & bye, 道不同不相為謀, 總之依個世界有人鍾意食橙, 亦有人愛蕉.... 我寧可繼續珠光寶氣囉。




我現在的朋友都很愛我, 緃然不會日日把酒言歡, 但是他們都讓我感覺很實在。我無需左防右防, 無需顧言, 有個句講個句, 大家真真心心咁講野, 真係開心。