痛

都覺得自已幾忍得痛, 點知今日俾阿醫師扭腰, mum腳個陣, 連嗌幾聲, 再加跋罐, 好痛.

乜唔係年紀大唔會怕痛既咩?

**********************************************************


一年了.

我腰傷, 你喉嚨痛...


























...

骨頭脆

去左做瑜伽, 一個簡單既彎腰抱膝既動作...我又整親條腰, 個下酸痛痛到入心, 卒知打後既九個字係度睇住人地做, 自己就坐埋一邊用念力希望唔咁痛!後來起身又行唔到, 要坐埋一邊, 中心d人問要唔要搵人黎接...搵邊個呢?個下個心酸一酸, 有邊個可以黎呢? 我可唔可以自己搞掂唔駛煩人呢? 太痛之下都唯有打俾細佬, 要佢30分鐘黎接我走. 因為出過汗, 點都要沖過涼至走, 用左極慢動作, 吹埋個頭就發覺自己都ok, 應該可以慢慢爬番屋企, 卒之用左龜速返到屋企...

返到黎, 連除褲都唔得個時, 我語重心長咁同我細佬妹講: 第時我冇人幫的, 你地真係要幫一幫我..

講完, 好酸...

星期六

悠閒既一日, 朝早訓到訓唔到至起身都只不過係10點, 搞下依樣個樣又去到2點, 訓下晏覺之後就5點, 諗住睇下又咩戲想睇, 卒知去到戲院門口又唔想睇, 結果去左商務睇完一本亦舒小說, 再行路返屋企都只不過係10點...

冇野好做, 冇野想睇...


極度無聊既一天









唉..

星期二檔案 - 中女告白

感受最深的是:

-點解就係因為我外表俾人堅強, 我就要係被受傷的一個?
( 喂你估我想成日起哂 "鋼"呀, 會俾人蝦呀, 你知唔知好辛苦, 好攰呀...)

-中女..有事業都要有3層樓揸手
(ok，　我會努力..先有一層先至算啦)

-要學會: <<不計較付出, 要豪俾佢>>
(數下數下, 都豪左好多...都冇乜得剩)

-冇人要 (暫時) 都好, 幾時都要係狀態
(okok, 即刻book左聽日修甲, 依家仲做緊mask．．．Queenie 真係幾靚)

- 只要活得快樂...



其實, 我都唔需要個男人好有錢, 只要係我有需要既時候, 你係我身邊, 俾個抱抱我, 話我知依個世界上我仲有你...

中了毒...

百無了賴從頭看了袁彌明ERICA個BLOG所介紹的產品...結果中左毒... 出血喇:



1) 綠粉 $320 - 一打開時個陣味好fresh, 但唔知係咪d粉唔係好溶係水, 飲左一半之後要成日搞, 個味都可以接受.

2) Botani Olive Serum (Squalene) $260 - 以serum 黎講, 依個價錢係叫平呀! 質感真係好油但又好吸收, 搽左都冇10秒就吸哂咯 (定抑或我太dry呢?)

3) Botani Eye Treatment $380 - 當做打底用

4) 3LAB ww eye cream $2000 - 好貴, 但係睇左幾個用家 (真係好隨意咁上網check下, 不過唔知係咪"煤"喎), 好似 (!!) 好好咁...即管試下. 之但係平時用無論平與貴(over $1500) 既eye cream 都好似差唔多效果. 好想依隻有效

5) 最強抗氧化丸---pHion Indigo $240 - 抗氧化 = 抗老, 長期戰爭黎既, 唔摼得!

6) beauty foot $160 - 幾得意, 不過未試 !

7) 塑身衣和收肚褲 $ $290 - 女人要keep 真係好辛苦呀

8) CARMEX LIP BALM $30 - 口碑都唔錯, 又平平地...

結果,埋單扣哂積分都用左三千幾...唔夠15分鐘..又未出糧, 又未拆利是....!

P.S 其實仲有其他野想買囉...

多過月之後...

我仍在...

-開始了, 常在怕...

-的起心肝, 脫了墨, 不過背脊個粒都仲有根, 仲要去多次.
當日躺在那張"手術床"時, 我真係驚.

-10月稻城亞丁, 1月去了台北仲要係高雄揸車落墾丁, 我覺得自己"升呢"....

依然盼望被愛.

睇戲

今日好熱, 一早一午去左睇戲..

禮儀師之奏鳴曲
感動。描寫細膩既感情, 每個場境都好好睇。
原來就算追到心中既理想, 其實倒頭來都未必係好。上天一定有條路預左俾你行, 到時候就會出黎。而且, 用心去做, 一定會做得好。

抵攞獎。

**************************************************

讀愛
琦溫絲莉好戲好左好多。話依套3級真係好多餘。
內容講到集中營個度有d震撼, 因為之前有考慮過經過德國個陣會去, 做過小小resarch。
其餘...唔識講...

.